اوباما فاز شدو روسكم يا كرعان.! - شلش العراقي

2008-11-09 :: بقلم: شلش العراقي ::
عدد القراء 245
شلونكم طولنه الغيبه لكن اذا عرف السبب بطل العجب والفرق بين العجب والسبب ، ع ج س ب ...بله مقدمات اريد احجي حجايتين موغفات على قلبي ، يعني العملية السياسية بالعراق العظيم سابقا الجديد حاليا مثل عربانه عتيكة وسوده ومصخمة وجروخ ما بيهه ، واحنه المساكين صرنه مثل لعبة الشطرنج ، رئيس اسود داخل بيت ابيض ،احنه شكو ، وعليمن محسوبين من عشيرة اوباما لو من طوايف ماكين ، العراقيين صايرين بين حانه ومانه ، ياهو الجاي ياخذله دمغه وعلى هلرنه طحينج ناعم..حتى من نتعود على ذباحينه يجبولنه ناس غيرهم ، هسه مو بوش وماكين نفس الطاسة ونفس الحمام ، والجماعة بالحكومة (متعودة دايما) على طريقة الكفخات الجمهوريين والخطة معروفة نصب قواعد وتفكيك العراق واسناد حلفائهم ومحاربة اعدائهم وشوي سرقة على شويه فساد وكم محاولة لتغير انظمة مجاورة وطبعا بلا ما اكول ان سورية وايران وتركيا والسعودية مقصودين بالتغير، يعني بين قوسين طريق السكين على رقابنا واضح ومرسوم بلا قلم ، مين طلعنه ابن عمي حسين راح يبيع العراق بفلسين ..هم اسود وكلنه عبيد الله خاف يزعلون علي جماعة قطاع 23 وقطاع 9 وخاصة بعد ما هجر كثير منهم الفنون الفلكلورية والدبكات والرقصات البصراوية واصبحوا مناضلين بجيش المهدي الخالد ، وبيناتنه الحجي اوباما ماعنده سالفه غير جلمتين والثانية يكول يمكننا ان نفعلها اي هي شنيه ما عرفنا ويانه علينه ، يمكننا ندمر العراق يمكننا نعمر العراق تاهت وتاه وياها عقلي ،المهم يا اخوني اجيكم من الاخير يكولون و على ذمة الحاجة الفاضلة والنائبة المبجلة سعدية ام اللبن ان الجلبي كلش ضاج وصعدت عنده الصخونه من فاز اوباما على عكس المالكي لان بوش جان حاصره بالزاوية ودك بوكسيات والاثنين بيناتنه الحجي مطفين..لان اوباما ما يكدر يروح للتواليت بدون ما ياخذ يهودي وياه خاف عبالكم امريكا دولة ديمقراطية اعتقد انتم غلطانين ،حلوه اعتقد ، صارلي هواي ما كايلها الواحد هم مرات يحب يتفلسف لو الفلسفة بس للربيعي ، عمي الربيعي طنطل فلك الطره يومية يطلعله بلتيغة حتى يصير محور الاحداث ، المهم مقتدى ومن مقره في قم صرح انه لن يتفاعل مع اوباما مسيكن السيد دخيل جده يتصور اوباما اذا ما تفاعل معاه جيش المهدي بكل ما يمتلكون من حبوب كبسله ام الصليب والحاجب راح يضعف ويمكن يكتب استقالته حتى لا يشور بيه السيد..سيدنا انته شلك بيها مو كلت راح اتفرغ للدراسة وتحصيل العلم اي امسك كتبك وشد الكاع مو سويتها بلا ملح وخلي اهل السياسية يحجون هسه الى متى العراق يدير اموره ابو عمامه جا ليش يروحون (الويلاد ) للمدارس ويتعلمون ، يعني يصير ابو عمامة يفصل وولد المعزايات يلبسون ،هسه لو يعرف يفصل هم جان كلنه خوش..سادتنا الافاضل انطونه عطوه خلينه نعرف تاليها وي ابو سمره الي شاد حيله علينه عبالك سعلوه ، المهم يا جماعه سبب دعوتي لكم بتجهيز قطع قماش اخضر (علك ) لتعصبوا رؤوسكم الشريفة ،هو ان المسؤولين العراقيين راح يدوخونه بتصريحاتهم التي ما قتلت ذبابة ولا خلت طابوكة فوك طابوكة في هذا البلد الجريح ، وكل واحد منهم يسوي نفسه عنتر زمانه وصديق اوباما الروح بالروح..وانه فخامة رئيس الولايات المتحدة الامريكية لطالما دعاهم الى مطعم ابن سمينه بالسعدون وباقلاء قدوري في ابو نؤاس ، وانه كثيرا ما تناول رفقة الحكيم وصولاغ والجعفري والمالكي وباقي الشلة الفلافل الشهية في مطعم هلي بالجوادر ،ويمكن يطلع اوباما بالاخير شيعي جعفري لو كردي انفصالي لو من جماعة ابو سدارة ، صحيح ابو سدارة اشو لا حس ولا نفس، جا العملية السياسية بالعراق الجديد حاليا العظيم سابقا مو غريبة عليكم..تغير جلدها كل فصل، لذا اقتضت الضرورة الوطنية اطلاق التحذير التالي ، يحذر شلش العراقي كل المسؤولين العراقيين الصغار والكبار هاي اذا بيهم كبير بعدم التطرق لعلاقاتهم الوهمية مع اوباما لانه وببساطة ما يشتريهم بفلسين وقد يبيعهم رفقة العراق مقابل بوسه تطبعها على خده العقرب الشقراء ليفني ، ههههههه ، خوش اسم ليفني لو لفيني لو لفني هواي الها دلالات بس لا تلفلف فلسطين والعراق ..الله يستر وشدوا روسكم يا كرعان وبصحتكم حبايب وبعدين احجيلكم وين جنت وليش غبت ، بس مثل ما تكول خالتي نورية الله يرحمها العافية درجات..!