2008-09-02 :: بقلم: عراقي محروك دمه ::
هذا المثل كان يردده والدي كثيرا كلما تشجعت وطلبت منه شيئا ولصغر سني وعدم ادراكي ماكنت افهم ماذا يعني والدي من مثله هذا..!؟تجيكم السالفة..!
هذا المثل كان يردده والدي كثيرا كلما تشجعت وطلبت منه شيئا ولصغر سني وعدم ادراكي ماكنت افهم ماذا يعني والدي من مثله هذا..!؟تجيكم السالفة..!
وانا متهيأ للذهاب كالعادة الى دائرتي مبكرا طبعاً حتى الحق بباص نقل الركاب لان اجرته أقل من اجرة الكيا, حيث تكرمت علينا حكومتنا الرشيدة بهذه الباصات وباجرة مدعومة مقدارها 250 دينار لكن اشوكت توصل الدائرتك بعد 3 ساعات ولذلك آني اغبش من الفجر حتى الحك على دوامي..وبينما أنا جالس في الباص وطبعا آني محظوظ لان حصلت مكان حتى اجلس جلس بجنبي رجل اكبر مني بسنوات تخرشت اذني من تاوهاته كان ضجرا تارة يلعن الزمن واخرى يلعن أمه وابوه لانهم خلفوه للعذاب, لم أتحمل الموقف ودفعي فضولي الى الاستفسار عما يحصل له فقال: "هية هاي صايرة ساعتين وبعدنا بنص المسافة وبصوت مرتفع وصل الى اسماع الكل ومنهم السائق فالتفت عليه السائق وبانزعاج.. اخوية اذا متعجبك هاي السيارة ليش ما اخذت تكسي..!
"تحوّل الموقف رأسا الى استنكار وضحكات من قبل الركاب وبقى الرجل المسكين صامتا لا يدري ماذا يقول ولكن بعبارة مختصرة كال "(اللي يدري يديري واللي ما يدري كضبة عدس..!).. بوية ليش آني من ركبت الباص عندي درهم واحد ادفعه اجرة ركبت بالباص على الثقة.. أجابه أحد الركاب أما الآخر فقال له وشعندك طالع من الصبح وانت رجال جبير ..!
أجابه الرجل المسكين بوية اشعندي طالع لوما الارباطعش حلك ينتظرني اروح للتقاعد بلكي جاي راتبي صارلي اربع وجبات اروح وارجع ويكلولي الحاسبة رفضت اسمك..!
ليش بويه الحاسبة عداوتها بس وياي؟ المهم كلت اذا استلمت راتبي ال 150 الف اتسوك واجيب أكل العائلتي واذا راتبي مطالع افرش واكعد يم دائرة التقاعد للشهر الجاي بلكت يفوت مسؤول ايفوت وزير واشكيله بس هوة الوزير اشعنده بالتقاعد حتى من يتقاعد جم شهر خدمه ويحصل على راتب 8 ملايين وتجيه للبيت.. اذا مو تروحله الخارج العراق لان اشعنده بعد باقي الجهال خلص اللي عليه وفلت..!
خلي القهر والضيم النا أولاد المعزاية..!
تدخل أحد الركاب وتحول الباص الى مقهى كل يفضفض عما في صدره..وقال: قبل ايام سمعت ان مستشار السيد رئيس الوزراء للشوؤن الرياضية المدعو بسام الحسيني قد, أحيل على التقاعد عن خدمة امدها أقل من سنتين وبراتب تقاعدي مقداره 8 ملايين أو ربما أكثر عدا الزوجة والاطفال..! حقه لان عائلته بامريكا مدري بلندن هم ايردلهم مصرف! اشبيك مجان صرت مستشار اشو هية كلها كلاوات ومضطهدين سياسيين ومفصولين والكل عايشين بالخارج.. جاب الشهادة وياه من ايران وتربع على الكرسي وصار مستشار.. المهم مو حقي من يحترك دمي والله حتى نسيت نفسي ومدري وين وصلت ..دايخ لان وصوني بالبيت أرجع من وكت حتى أصلّح المولدة وأجيب بانزين واتسوكلهم على مود رمضان.. بالمناسبة خششت بعقل العائلة كلها وصية ( صوموا تصحوا ) أنه اللي يصوم الله يذبه بالجنة ويصح بدنه هوة بدنه خاوي من كاعة حتى على الاقل اكدر اوفر جم فلس للعيد يردون مني اهدوم وعيديات..اعزائي لا تتضجورون مني اذا اكثرت بالكلام تره آني شايل همي وهم غيري وهسه اتكولون عليه احوال عنده حاسبة وخط انترنيت.. لا كفيلكم الله.. أحد اصدقائي علمني اشلون استعمل الحاسبة وكلت خلي اشوية اذوق من الحضارة اللي جابتها النا الحكومة الرشيدة وكمت اروح للمقهى بدال ما اشرب شاي انطيلي 500 دينار حتى أفرغ همومي وهموم غيري من خلال الانترنت وافضح المستور وآني من النوع اللي أحب اسمع كلشي وبامانة..
أخوكم المحروك دمه
ليست هناك تعليقات:
إرسال تعليق