علي الهاون
تفاجأ الكثير بمؤتمر( رئيس الوزراء العراقي) نوري المالكي حول قضية الصحفي العراقي البطل منتظر الزيدي ,سواءا من جهة توقيته او من جهة طريقة تعاطي المالكي وتعامله مع الحدث, حيث دهش الجميع بطريقةلا تشابه الانبهار التي اصابت الجميع من موقف البطل منتظر الزيدي بل هي دهشة من نوع اخر من جراء ماطرحه المالكي دهشة تشابه شعور انسان تفاجأ بما لم يك يتوقع ثم يقوده هذا الشعور الى محاولة البحث والتقصي والمتابعة عله يصل الى سد الفجوة بين ماكان يتوقع وبين ماوقع فعلا ,فالنتيجة التي يخرج بها كل متابع منصف وموضوعي هي ان هذه الحكومة لن تبلغ الرشد ابدا ورئيس وزراءها لايمكن ان يتعظ ويتعلم من اخطاءه السابقة ومااكثرها بل انها حكومة مصرة على السير في غيها وكذبها وافلاسها وزيفها.
يابه ابو اسراء صارك جم يوم ضام راسك حته اتحضرك جم جلمة صفوطهن الك اللوكية من مستشاريك ,وهسه ياريت حجايات بيهن خير حته اتصدك بيهن الناس مو حتى الزواج مو بس من حكومتك حته ازواج الشرق الاوسط الجديد كله ماصدكه بيهن , شنهي الفلم ابو اسراء صاير اتحشش عل الشعب لو شارب ....نفط , مو الناس جانت تنتظر منك فعل مال رجال وسمعوك (وطبعا هاي الفخر بيه مو الك خلف الله عله منتظر لان من وراه سمعتك الناس) ولو ماهوه من يشتهي يباوع عله خلقتك الزفرة لو سوالفك التعبانه اكو غير المكبسلين والمفصومين والامرتينين .
خطية ابو اسراء مانام ليلته لمن ودوا لمنتظر فراش وبطانية(من البطاطين المحضره للدعاية الانتخابية) خطية كلب والده , يابه مانام لمن اتاكد منتظر مابي شي ونام يعني اكلبه بكرك والعاقل ايفتهم , النوبة ايكول اعرف من دفع منتظر واحد يذبح بالعراقين شنو ابو اسراء هوه مؤتمر صحفي لو مؤتمر حزورات لونلعب امحبيس , بعدين ماتكوله قابل خايف لو مستحي اشو الشهادة لله انته ماتخاف بس من بوش ورايس وغيتس وادورنيو واباما وعلي خامنئي واحمد نجاد وقائد فيلق القدس وعبد العزيز والمليشيات الحصرتك بل البصرة وجماعة المرور اللي رادو ايسون عليك انقلاب مال افلام كارتون و....و.....و.....وحتى الله انته ماتخاف منه لان لو تخاف من الله جان ماسويت هيج بالعالم , وفوكاه مو بس ماتخاف ماتستحي وماكو ابكصتك نكطة حيه , يمكن ابو اسراء مثكل شوية ويقصد لو الطنطل لو السعلوة لايا طنطل عله السالفة , لو هاي اشارة لكاوليتك اقصد الاعلامين اللوكية مال الحكومة اللي اتعلمهم وتسولفهم على الاعلام والاعلامي شلون ايشتغل لازم ماكفاك تشتغل رئيس وزراء لو كولجي مال قنادر لو بالجماية مال اغاتك بوش النوبة صاير اعلامي وتحش بروس الاعلامين الكمش والقشامر اعلامين مال حواسم وشد البدعة يعني صدك سبع صنايع والبخت مو ضايع طايح حظة ,مبينه الشغلة هي اشارة للاعلامين اللوكية حته ايدورنون على جم واحد ويلزكون التهمة بيهم لزكة علج يعني حته الشغلة مال منتظر لازم تستفادون بيه بطريقتكم واتصفون بيه جم واحد حاسبيه عدل احساب يهود مو احساب عرب, وبله ابو اسراء ابداعت ام اسراء يعني بوش مايدبح بالعراقين ومادافعك أي هسه علينه هاي الدروب الضيكة وملاعيب الخبز اليابس.
وشنو سالفة ال 35 فضائية لازم هاي هم انتم سويتوه والله لو ابيدك جان لو سديتهن لو خليتهن مثل روتانا الفرات لو قناة المسار الفطيرة, وهاي سالفة القانون والقضاء مستقل شوفلك ناس غير العراقين بيعهن عليهم يعني خي ويلن ذني ابو اسراء شو وزراءك ومستشاريك مايشتهون ايبكون خطية وصرنه احنه والصومال سوة جا وينه قانونك لو لمن انصير وره زيمبابوي لو باركينه فاصو .
يعني صدك ماتصيرك جارة انته وحكومتك اتظلون عوج دوم مثل ذيل الجلب شدوه اربعين يوم ومانعدل يعني لو اربعين قندرة مثل قندرة منتظر هم ماتعدلك.
alialhawn@yahoo.com
ليست هناك تعليقات:
إرسال تعليق