كتابات أبو الحق
السابع والعشرين من مايس
2008



عودة الزيبرا الضال




اليوم فزّيت من الفجر على صوت عياط من آخر قطّاع بالغابه...
هوسه وعجاج وأصوات عنفصه إتكَعّد حتى الميّت,
ذَبّيته واحد أصلي ونهضت , وطلعت ليهناك بلكت أشوف شِسّالفه......ما شوف إلا فد زيبرا إمكَابلني وهوّه دا يفرّك بعيونه المدمّصه ويمشي بازم بزدم, عبالك شارب بطلين عرك هبهب...
"ولك هاي شبيك, هَي أثولْ ؟؟مَتروح تخسل بالماي ذاك, أخاف عيونك صابهه تراخوما؟؟"
كَلّي:" يمعود وين راح بالك..آني من جماعة الصحوه...هاي شبيك؟؟ قابل عايش بغابة بولونيا؟؟"
سِئلته للأفندي وهو بَعَدَه يفرّك بعيونه المدمّصه: "شنو يعني صحوه؟؟؟إلهه علاقه بالحصوه؟؟"...
....أشوهذا صفن, عبالك كَير أوتوماتيك كّايمه كلجاته والدرَمّات, ومنعول أبو التورباين مالته, ردّيت سِئلته:
"يا أخا العجم, إنته من يا صحوه؟؟ ذوله اللي ضامهم الضيم وهبّوا يريدون يخلصون أهلهم من المجرمين, لو من ذولاك الألبوريشه مدري ألبو ضروك, السلابه اللي جيّفوهه كل هالوكت, وبعدين كَاموا يبيعون شرف براس الناس؟؟"
باوعت عليه شفته مغمّض عيونه, عبالي مدولغ و دا يفكّر, أو يمكن دا يتصل بصديق على طريقة التليباثي, اشو هذا كَام إيشوخر...يعني أخذله إستراحه من طور الصحوه...فرأسَن عرفت هذا من النوع الثاني,
.... هَسّه أريد أعرف فَدْ شي..وين جان نايم هذا الزيبرا وجماعته من أربع سنين إبنص كل ضرب الحذيان اللي صار؟؟ قابل الزيبرات طلع بيهه نفرات يعيشون نفس تجربة "أهل الكهف"؟؟

ويَمْ فدْ شِجره كلّش عتيكَه, يمكن من زمن دقناووز الثالث, شفت جم زيبرا متبطّحين عالحشيش و واحدهم ينظف سنونه من فتايل اللحم ويذبهه ببيوت النمل اللي يَمّه , وطالعَتلهم إنياب,غي والله, معقوله؟؟ زيبرا وياكل لحم؟؟
صاحبي الشاذي شافني صافن وهوّه فوك الشجره وجان يطكَ من الضحك, كَللي
هذوله فد جم واحد من الدايحين ,كل يوم جانوا مسوّين ستامبيد بالغابه ومعثوليهه بالتراب والعجاج, و جانوا ياكلون حشيش مثل ربعنه..أشو على غفله صاروا ياكلون لحم...أثاري إتبَيّنْ أكو فد زيبرا خوشي علّمهم ورتّب إلهم دورات تثقيفية, و دورات تدريبية, ودورات غسل دماغ , ودورات غسل إصماخ , بالغابه اللي يمنه, ومن يومهه والغابه تعيش بلاوي كل يوم... وهسّه ما أدري إشصار, لأنه المدرّب اللي" حوّرهم" كَلب عليهم , وما نشوفه هَسّه إلا وكل يوم سايكَ عليهم بالتواثي ويعيط بيهم:
" كما كُنتْ"...إيريدهم يكََلبون عكَرب ويرجعون زيبرات نباتيّه!!! أكو هيج حجي بويه؟؟؟
هسّه المشكله أنهو هذوله مَتصيرلهم جاره بعد... المختار أبو الوقف الحيواني راح على خضير ماهود أبو التحوير مال تانكيات البانزين وسِئله إذا إتصير إلهم جاره, بس خضيّر كَام يضحك عالمختار وكَلله :
" أيّسْ كريّم"..المختار أخَذلَه صفنه وكَال: " وَت دو يو مين؟؟"
, رَد خضيّر كَلله:
" يعني مش بوزك مولانه , هَذوله مَتصيرلهم أي جاره, لازم تحركَوهم همّه وأبهاتهم, التحوير مالهم إرّيفيرسبل... يعني غير عكسي, وبالمناسبه مولانه, أنته شنو شغلك, يعني شتسوون بالوقف مالكم"
المختار إتنحنح وإتقرّب من خضيّر وكَلله:
" عمّي إذا ردت تروح للحج, آني حاضر"!!!
أرجع لسالفتنه وما عَلينه بالسياسه...
المصيبه إنهو هذوله عدهم سلاح إمكَد سليمه إخضيّر...والمدرّب اللي سوّاهم وحشيين يتغذون عاللحم ويتزقنبون برزولات و تحتاني من الفجر, هسّه هوّه نفسه يريد يرجّعهم عالبكّ....تعالوا بَلله, هاي شتخللولهه وتطيب؟؟

الحقيقه آني دخت اليوم من الشي اللي شفته وسمعته, بس إشويّه إرتاحيت من قريت هالكَرافيتي على شجرة السنديان الجبيره, عليكم النبي سليمان إقروهه ويايه:

* عندما تتحول بيئة الحياة من حولك إلى غابة, فأنت ملزم بأن تختار..هل تكون مع
الأسود ,أم تبقى مع الغزلان؟؟
*........وفي كلا الحالتين, فأنت مطالب بأن تجيد الركض بأسرع ما يمكنك!!
* حتى في الغابة هناك قوانين, يمكن أن يكون أحدها" لا تنظر لليمين ولا لليسار عندما تعبر الطريق", لكن أكيد أنه لا وجود لقانون إسمه" حقوق الحيوان" !!
* إذا شفت زيبرا ياكل لحم ويمصمص العظم, دير بالك إتصفّكَله, يمكن يطلع دا ياكل واحد من كَرابتَك..
* إذا كَلولك راح إنسوّي إستنساخ حيواني ونطلّع جيل من الزيبرات المحسّنه, دير بالك توافق , تره ينعلون شيب أبوك بعدين!!
* ليكن شعارك دوما : لَتعاشر البَذات, والماله تالي.