لا الروبه تروب ولا الگـ.....به تّوب

الثلاثاء, 09 ديسمبر 2008 00:00
شلش العراقي

خنجر : هذا الحكيم شكد ما يستحي مثل عيون الگـ........به
شلش : ليش سوه مصيبه جديدة
خنجر : هم حرامي وهم صكاك وهم يفتح عينه مثل البومة ويكول مصلحة العراق اولا وانتخبوا ابناء شهيد المحراب عمي الشهادة صارت تتوزع وي الحصة التموينية ياهو يكضي عمره مجرم ويموت بسيارة مفخخة كالوا عليه شهيد
شلش : سكتت وتركت خنجر واني ادردم ذنب كل اسرى العراق بركبة المنتوف ابن المنتوف الحكيم
يتناقل الموروث الشعبي العراقي أخبار الغواني والعاهرات وبنات الليل بمزيج من الرفض والاحتقار والاستهجان والسخرية ، فالعراقيون غير شعوب الارض كلها فالشرف عندهم قطرة دم والخجل قطرة عرق والعاهرة مخلوقة منبوذة تحاول ان ترسم بجسدها مستقبلا زائف واستقرار وهمي الا ان الأقدام تركلها بعد نهاية مدة صلاحيتها فتعلن التوبة المخادعة للرجوع مرة اخرى الى دائرة الاضواء والاهتمام ، سوادي أبو الدوندرمة يقول السياسي يبقى مجلوب والعاهرة عمرها ما توب وهو لا يعترف بتوبة العاهرات ويرتكز في عدم اعترافه على القاعدة القائلة ذيل الجلب ما ينعدل لو خلوه بين سنون الحكيم اربعين سنه مو اربعين يوم ويضيف سوادي قائلا يعني بعد ما داحت وشبعت دياحه اتوب وتنافسنه على دخول الجنه هاي ابدا مو مقبوله وتعرفون سوادي حاله من حال الكثير من المتدينين النص ردن يعتبر الجنه مال الخلفوه ويخاف تقبط بزيادة عدد التائبين عبالك هي تاته على خط باب المعظم علاوي ، وعلى ذكر علاوي الحله اشو علاوي ابني كبر وبالمعارضه صار وعلموه اول درس علموه يبيع الاسرار
عمي علاوي جا وينك اشو فص ملح وذبت شنهي ما شنهي مو كلنه انت علماني ومن جماعتنه ولاعب طمه خريزه وي الكل من بعثية وشيوعيه الى علمانيين وتكنوقراط ، اشو فلتت والفلته فلته شبيك لعد بس تعرف تجيب الامريكان طاح حظك علاوي شكد عفطي ومالك امان همزين ما انتخبتك جان كتلني القهر لان اني ما اتحمل واحد يطرحني زوج على فكرة لم اقم بالتصويت طوال حياتي البائسة على حزب او شخص ،علاوي صار طبخ النارين او يمكن بوخه ومثل ما تكول صبيحة ام الروبه لا حضت برجيلها ولا خذت سيد علي طبعا سيد علي السيستاني مغلس كلش ومخلي الوضع بيد الربيعي مسيلمة العصر وابنه محمد رضا ابو القمار ومرتجي ونايم والله اني شيعي ابن شيعي واعرف ان السيد يشور بس اعتقد ان العراق يشور اكثر ،
نرجع الى بنات الليل اجلكم الله وحشاكم يكول سوادي ابو الازبري ان بنات الليل ما يعرفن التوبه بمعنى التوبة بل يعزفن عن استخدام اجسادهن للتحول الى مهنة ادارة شؤون اجساد اخريات ومهنة الدعارة ومن بعدها القوادة من المهن القديمة كما تشير الدراسات التاريخية ، هذا يقودنا الى حقيقة مهمه ان الدعارة السياسية ينطبق عليها نفس القواعد يعني الحكيم والجعفري وعلاوي والطلباني والمالكي والهاشمي والدليمي وبروح ابوكم ذكروني اذا نسيت احد تعرفون القرود هواي ، الجماعة جانوا يمارسون العهر السياسي وقريبا راح يتقاعدون ويتحولون الى فن ادارة العهر السياسي واكثر واحد شاكني شك ومدوخني الحكيم يوميه يطلعنه بسالفه مره استقلال الجنوب ومشروع اقليم الجنوب ومره الحق التاريخي للشيعة ومره نصرة الشيعة وهو ملعون الوالدين لا اله علاقة لا بالهايشه ولا بعلفها يعني الحجي بالتفاطين هو هم ايراني وهم تلثارباع اهل الجنوب ما يشتروه بطكاكية وهم وجهه مثل نعال ابو الاصبع والنوب يحاول يصادر قرارنا الشعبي ، ماكو عراقي شريف يقبل بتقسيم العراق تحت اي مسمى وماكو عراقي شريف يقبل امه واخته يعيشون ببلد تكدر الامريكان باي لحظة يطلعون من قواعدهم ويجروه من نص عائلته بحجة مكافحة الارهاب وهاي الافلام الهندية ، يا جماعة هاي الاحزاب اسماء بلا قواعد وما علينه بذولي الجم زعطوط الشايلين لافتات مدفوعة الثمن ونصهم ما يعرفون يقرون شمكتوب بيها ، الحكيم يا جماعة زمال ، وحتى لا تكولون شلش متحامل على الحكيم اريد اكله من رخصتك مولانه لان ذاك الدب القطبي مفركس كلبي وكلب الخلفوني واقصد هوشيار زيباري ومن رخصتكم اخواني واخواتي اريد الزمه من ياخته ، اخواني القراء كلكم تصوروا نفسكم لازمين زيباري من ياخته وبعد جم راشدي وتفله بنص وجهه اكله ولك فضحتنه بين الطوايف وانت كرشك متر وعلباتك عبالك تاير لوري شبيك ما شايف ولك وين الزايعته الكاع مسويه سفير ووين الحرامي ومعدوم الاهلية والمرؤة مسويه قنصل لك شني هي فرهود نعلت ابو الي جابك علينه يعني فوك ما ممتحملين العار ابن العار الطلباني وسوالفة الي شهرتنه وفضحتنه وسط الاوادم ، لك شبيك لبس ما تعرف تلبس ، بوك بالجمله ،فساد للسكف ، ومحسوبية وتعين معاقين اخلاقيا ، ولك استحي مو الخارجية واجهة البلد لعنة ابو الي جابكم للبلد ، مو اخرتك راح يعدموك العراقيين بالقنادر العتيكة تفوووو على وجهك يا منغولي ، طبعا اكو هواي منغولية بالحكومة يعني مو بس السيد الي كاعد بايران يتزوج متعه ويفتي خره بالوكت الاغبر الي يخلي الشرفاء مشردين بره البلد والزعاطيط والمرتزقه والكواكويد يسرحون ويمرحون ولكم مالت عليكم وعلى حظنه ولكم اشك هدومي واخلي اهالي الثورة المباركة يقولون شلش لبسه جني
بس راح اتوجه بالدعاء لابو خيمة الزركة ، يا رب لقد دمر العراق القواد الحكيم وانت بأفعاله بصير عليم يريد تقسيم البلاد وتشتيت العباد وتقطيع ارض السواد ، وشفط الجادرية عن بغداد وتسميم حياة العباد اللهم ألحقه بقوم ثمود وعاد ،اللهم اهلك فيلق الغدر لاتبقي لهم ولاتذر واجعلهم حجرا على حجر، لقد قتلوا الاطباء والطيارين وشردوا العلماء والاكاديمين ،اللهم اغفر للشيوعيين غفلتهم عن الدين فاولئك مساكين يحبون احبابك المساكين ، وكن لنا ولا تكن علينا ،اللهم نسألك يا غفور يا رحمن يا رحيم ،أن تفتح لأدعيتنا ابواب الإجابة،المجرم لايعاد انتخابه ، مهما تعددت اعذاره واسبابه اخذل قائمة المشعوذين ،قائمة استغلال الدين وانصر عليهم الكلدواشوريين وسائر العراقيين لقد وعدونا واخلفوا وعاهدونا ونقضوا يا من اذا سأله المضطر أجاب، يا من يقول للشيء كن فيكون ،اللهم لا تردنا خائبين ،وآتنا أفضل ما يؤتى عبادك الصالحين ،وحبب قلوب الناخبين الى قائمة تفصل السياسة عن الدين ، اللهم ولا تصرفنا عن بحر جودك خاسرين ،ولا ضالين ولا مضلين واغفر لنا الى يوم الدين ،برحمتك ياأرحم، اللهم انصر الكتاب المهجرين وارزقهم مكان في عليين ، إسلاميين كانوا أم شيوعيين لانهم لكلمة الحق حافظين ولعظمة العراق مروجين اللهم العن الحكومة والبرلمان والاحزاب وكل معتدي على بلد النهرين امين امين

شلش العراقي
http://us.mc655.mail.yahoo.com/mc/compose?to=shalshaliraqi@gmail.com هذا البريد الالكتروني محمى من المتطفلين , يجب عليك تفعيل الجافا سكر يبت لرؤيته