اغنية مهداة لمحمود المشهداني
سويج طك امه بحديده
وهذا اخر ما طاح بايده
سويج طك امه بحديده
لبس غندرته الجديدة
سويج طك امه بحديده
مسودن وبالبرلمان اريده
سويج طك امه بحديده
طاح حظه وحظ دهاريبه
سويج طك امه بحديده
اذن يا سادة يا مساكين من سكنت الثورة وشارع فلسطين انتهت اللعبة والي صار صار والمشهداني استقال وماكو شي بالعراق محال حقه تعب من النضال والقتال من اجل حقوق النساء والاطفال و يومية ماخذله بنية عمرها سبعطعش سنه وشريط فياغرا لان الرجل مناضل وعليه فهو يحاول ان يقضي على ازمة العنوسة المتفشية بسبب انتقال الشباب العراقي الى البراي عز وجل بيد القاعده او الميليشيات او هجرتهم الى جميع القارات ، طح حظك محمود وطح حظ هيجي برلمان شلة حرامية وشواذ وعملاء ومناضلين فوق آسرة الحسان ، والاخوة بالتوافق مشغولين بتوفير بديل يزيل اثار محمود المصخمه بصخام وجه وتصرفاته ، بوييييييييييييييييييييه ، 40000 دولار ، دولار ينطح دولار ، كونية فلوس ،بيكم دنانير عراقية ، هذا المعزه شراح يسوي بيها ، وشنو الي قدمه للعراق علمود ياخذ هيجي تقاعد ، تصوروا ان ابو ستار مدرس ريضيات 30 سنه تقاعده 40000 همين بس دينار ، 30 سنه خرج بيها اجيال وعلم بيها نص مدينة الثورة وبعدين تساويه الحكومة العراقية وي واحد حرامي بالاصفار ولكن اصفار الامريكان غير اصفار الفقراء ، ولكم شبيكم اتودنتوا على الشعب ، فرهود خوما فرهود ، 40000 دولار ، بيها خبز وطماطه وخيار لمدينة الثورة لعام كامل ، هو راتب عميل لكن يدفع من ميزانية العراق وبامر امريكي !
والسؤال هو هل يوجد راتب تقاعدي بهذا الحجم ؟
ماذا يستلم المساكين من ابناء العراق الذين لا يملكون مالا لشراء قنينة غاز في الشتاء البارد ؟
كم يعادل راتب المشهداني التقاعدي من رواتب المدرسين والمهندسين والاطباء والعلماء والاساتذه ؟
يعني ليش اطلعوني من طوري ، قابل المشهداني اخترع الدعبل لو صنع القميص بلا ياخه
بس شسوي راح افتح زيجي وانخي ابو خيمة الزركه ان يصاب محمود ومن سهل له هذه السرقة العلنية وبوابها له قانونيا بداء لا شفاء منه حوبة الايتام والاطفال والارامل والعجزة الا لعنة الله على كل من ما يستحي --
شلش العراقي
ليست هناك تعليقات:
إرسال تعليق